Starfsfólk Akurskóla óskar nemendum sínum og fjölskyldum þeirra gleðilegs sumars – með þökk fyrir samstarfið í vetur. Skrifstofa skólans verður lokuð frá og með mánudeginum 28. júní og opnar aftur eftir sumarleyfi mánudaginn 9. ágúst 2010. Skólasetning verður mánudaginn 23. ágúst nk. Tímasetningar verða nánar auglýstar í staðarblöðunum þegar nær dregur. Eigið gott sumarfrí. Sumarkveðja
Akurskóli útskrifar nemendur í 10. bekk í fyrsta sinn
Fimmtu skólaslit Akurskóla fóru fram í gær þriðjudaginn 8. júní á sal skólans. Þessi skólaslit voru söguleg fyrir þær sakir að Akurskóli útskrifaði í fyrsta sinn nemendur í 10. bekk en það voru 35 stoltir nemendur sem tóku við viðurkenningar- og hrósskjölum sem samnemendur og kennarar þeirra höfðu útbúið. Þessi árgangur hefur ætíð verið elsti árgangurinn í skólanum og hefur vaxið og dafnað með honum síðustu fimm árin. Skólaslitin voru einstaklega hátíðleg og að athöfn lokinni voru kaffiveitingar í boði foreldra.
Þemanu „Undir berum himni“ lauk í dag föstudaginn 4.júní en síðastliðnir dagar hafa verið hreint út sagt frábærir þar sem veðurguðirnir hafa verið okkur afar hliðhollir. Nemendur og starfsfólk skólans hafa sameinast í fjölbreyttum og skapandi verkefnum og brosandi andlit hafa verið áberandi þessa vikuna. Foreldrar og aðstandendur nemenda Akurskóla eru hvattir til að koma í heimsókn til okkar á opið hús mánudaginn 7. júní kl. 12.30 og skoða og upplifa afrakstur vikunnar með okkur.
